Anar Əhəd

Mənə dostum deyən oğlanda sədaqət dağıdır,

O qədər çoxdu vəfa, sevgisi dəhşət dağıdır.

Yığıb ətrafına yaltaqları yoldaşlıq edər,

Ona tərif deyənin uğruna sərvət dağıdır.

Sənə dostum deməyim saflığımın sayəsidir,

O ötən xatirələr qəlbimə nifrət dağıdır.

Elə zənn eyləmə qəlbimdə sənə sevgi qalıb,

Səni xatırlamağım sadəcə diqqət dağıdır.

Fərqi yox hansı məhəbbət ürəyin hakimidir,

Ta əzəldən bəri hər eşqi xəyanət dağıdır.

Elə bir dosta ürək ver yada Allahı sala,

Pisi qəlbindən uzaq tut ki, o möhnət dağıdır.

O kəsə dost de Anar, çöhrəsi iman nurudur,

Elə insan özü ətrafına zinət dağıdır.